Incidencia do fin da competición para o club

Era un secreto a voces dende fai uns días, o fin da competición federada da presente temporada, a 2019-2020, pero dende onte xa é oficial, pois a Federación Galega de Baloncesto comunicouno a través da súa páxina web e informou ós clubes vía email. 

Esta decisión ten importancia para o noso club pois supón o remate da actividade para 154 deportistas, divididos nos doce equipos que tiña o club na presente temporada.

No aspecto deportivo, rematar a temporada desta forma provoca que varios dos equipos que estaban nas fases de ascenso (os equipos junior) queden sen opcións de acadalo e os dous equipos que lideraban a súas ligas e tamén disputarían a fase de ascenso (o Turismo Carballo, cadete masculino e o Carnicería Daniel, infantil masculino) se queden sen comezala. Un duro revés para os xogadores que levaban dende finais de xullo adestrando. Tamén no plano deportivo, os oito adestradores do club quedan sen ocupación dende o mes de abril ata que as autoridades sanitarias decidan que se poida reanudar a actividade deportiva; toda unha incógnita vendo a evolución da pandemia e sen data clara de comezo. 

No plano económico, o club queda nunha situación saneada ,sen deudas pero pendente das subvencións e dos patrocinios para afrontar a segunda parte do ano. No club todos os xogadores pagan unha cuota mensual e este ingreso xa non se produciu no mes de marzo por culpa do inicio da pandemia.Non hai ingresos pero si que se manteñen gastos nestes meses.

 Pero pese a isto a principal duda, a principal cuestión que se prantexa dende o club e como será a temporada 2020/2021 e cando comezará. Son dous interrogantes de gran calado e de gran importancia para os que non se teñen resposta. En reunións mantidas con outros clubes e consultas con outros disciplinas deportivas, a situación é similar,con  moitas dudas de cando se poderá realizar actividade, como se pode comezar, como serán os formatos de competición, …

O club, de todas formas, ante o anuncio da FEGABA, xa comezou a traballar para a planificación da temporada 2020/2021 e vai manter contactos e reunións cos técnicos e cos grupos de xogadores do club.

Conclusión da temporada 2019/2020: Comunicado da FEGABA

A continuación poñemos o texto que acaba de publicar a Federación Galega de Baloncesto na súa páxina web, na que informa da conclusión da temporada 2019/2020 tras a consulta mantida cos membros da Asamblea:

A Federación Galega de Baloncesto dá por concluída a temporada 2019 - 2020. A entidade federativa, tras finiquitar a consulta realizada á súa Asemblea Xeral, na que se lle cuestionaba sobre o criterio de actuación respecto a todas as competicións vixentes ante o escenario de alerta sanitaria e estado de alarma, comunica que estas finalizan de xeito definitivo.

En concreto, e cunha participación total do 73% da Asemblea FGB, a opción resultante como a máis votada, elixida por máis da metade dos votantes; foi a de non continuar coa competición, pechando as ligas sen palmarés de campións nin descensos e, no caso daquelas que tivesen establecidos ascensos, disputar fases clasificatorias no futuro, en forma e data a determinar.

Encaramos unha situación que a Federación Galega de Baloncesto nunca quixera ter que afrontar, pero a prioridade neste intre é a saúde de todos, cumprir as medidas marcadas polas autoridades sanitarias, así como respectar a decisión da Asemblea Xeral, órgano supremo da FGB.

Neste punto, a Federación Galega de Baloncesto lamenta todas as molestias que este peche competitivo pode ocasionar, e quere recoñecer e agradecer o esforzo humano e a comprensión de toda a familia do Baloncesto Galego: xogadores, adestradores, árbitros, oficiais de mesa, persoal deportivo e directivo dos clubs e afeccionados.

Dende este mesmo intre, a FGB continúa traballando a través da súa Comisión Delegada e Xunta Directiva no estudo das bases de competición da vindeira temporada e das medidas necesarias a tomar  para protexer ao Baloncesto Galego e ao seus clubs ante o novo escenario sanitario, deportivo e estrutural que debemos afrontar.

Incidir  en que  a FGB continúa dispoñible para o contacto directo con todos os clubs e federados de xeito virtual a través dos seus mails oficiais e redes sociais.